Musharixiinta Madaxweynaha iyo Ku-xigeenkiisa Dowlad Gobolleedka Hirshabeelle oo is diiwaangaliyay
Isniin, November, 09, 2020
(HOL)– Waxaa goor dhaw la soo gabagabeeyay diiwaan-galinta musharixiinta u
taagan xilka madaxweynaha iyo ku-xigeenkiisa dowlad gobolleedka Hirshabeelle.
Guddiga Doorashada ayaa u
diiwaan-galiyay musharixiinta xilka madaxweynaha Cali Cabdullaahi Xusseen
Guudlaawe iyo Cabdiraxmaan Jimcaale Cismaan , halka madaxweyne ku-xigeenna ay isku soo taageen
Yuusuf Axmed Hagar Dabageed iyo Maxamed Maxamuud Cabdulle [Maxamed Dheere]
Doorashada ayaa mar waxaa
harreeyay shaki ku saabsan in ay dib uga dhici karto waqtiggii ay u asteeyeen
guddiga qaban-qaabada kaddib markii xilkii madaxweynaha uu isku soo taagay oo
kaliya Cali Guudlaawe.
Balse musharax Cabdiraxmaan
Jimcaale ayaa galabta uun laga war helay is diiwaan-galintiisa isaga oo aan horay
u sii shaacin ka qeybgalkiisa doorashada.
Kooxda ololaha doorasho Cali
Guudlaawe ayaa saacadihii ugu danbeeyay dadaal dheer u galay in la helo
musharax madaxweyne si dib u dhac looga ilaaliyo jadwalka.
11 bishan November, oo ku beggan
maalinta Arbacada ee toddobaadkan aynu ku jirno ayaa lagu waddaa in magaalada
Jowhar ay ka dhacdo doorashada madaxweynaha iyo ku-xigeenkiisa oo dad badani aaminsan yihiin in ay gadaal ka riixeyso Dowladda Federaalka.
