Isniin, Agoosto, 23, 2021 (HOL) - Maxkamadda ciiddamada qalabka sida ee Soomaaliya, ayaa saakay Cabdirisaaq Maxamed Cabdi Jimcaale oo lagu eedeeyay inuu katirsan yahay Daacish ku xukuntay 15-sano oo xabsi Ciiddan ah.
Maxkamadda waxay ninkaan ku heshay in uu ahaa u qaabilsanaha kooxda Daacish lacagaha la isugu diro Xawilaaddaha.
Warbixintiisa dacwadda waxaa lagu sheegay, in sannadihii 2019-2020 uu lacag ka badan $400,0000 u isticmaalay shirkad lagu magacaabo Heeryo trading interprise
Maxkamaddu waxay sheegtay in lacagtaasi qaarkeed ay u gacan gashay muwaadiniin u dhashay Uganda iyo Ethiopia oo ku sugan South Africa.
Hay’adda NISA ayaa la sheegay in ay bishii Seddaxaad ee sannadkan qabatay eedeysanaha oo sitay lacag dhan $19,000.
Intii uusan ku biirin Daacish 2016, maxkamaddu waxay sheegtay inuu katirsanaa Alshabaab illaa 2008, sidoo kalena uu dhaawac ka soo gaaray dagaalladii u dhexeeyay Alshabab iyo Dowladdii KMG ahayd ee Madaxweyne Shariif Sheikh Ahmed.