Sabti, December, 17, 2022 (HOL) - Maxkamadda ciidamada qalabka sida ayaa Maanta xukuno kala duwan ku riday sideed ruux oo midi haweeney tahay, kuwaas oo loo haysto waxa loogu yeero argagixisanimo.
Kooxdaan Maanta ay Maxakama xukunada kala duwan ku riday ayaa la sheegay iney kawada shaqeeyeen dilal qorshaysan iyo dhacdooyin kale oo arbushaad ah, kuwaas oo gacanta lagusoo dhigay 17-kii bishii September ee sanadkan.
"kooxdaan oo falalka ay gysanayaan ku kala fuli jirtay RBG, F1 iyo AK-47, sidoo kale waxay u kala qeyb sanaayeen Madax Maaliyadeed, Madax Caafimaad, Bajaajle iyo dawaral Gaari" ayaa lagu yiri Waraaxafadeed kasoo baxay Maxkamada Ciidamada Qalabka sida.
Warsaxafadeed Maxkamadda ciidamada qalabka sida ayaa sidoo kale lagu sheegay in kooxdaan isku xiran lasoo qabtay xili ay ku fashilmeen qorshe ay fulin rabeen, haatana ay soo dhameysteen dhamaantood habraacyadii Maxakamadda 10-kii bishaan Decembar.
Xukunada kala duwan ee Maxkamada ay ku riday kooxdaan ayaa u dhacay sidan hoose:-
1- Cabdi Naasir Cusmaan Nuunow dil toogasho ah oo ah qisaasta Marxuum Maxamed Xaashi Faarax oo ku geeriyooday weerar arbushaad ah oo uu ka fuliyay Macaani, isagoo begsasaday gaari Taraafiko ah oo Jiidayay Bajaaj Shil ku gashay degaanka Ceelasha biyaha 7-dii September sanadkaan 2022.
2- Xasan Cali Xuseen Ibraahim ayaa isna lagu xukumay dil toogasho ah oo ah qisaasta Marxuum Cabdiraxmaan Cabdulqaadir Cabdi Axmed oo ka tirsanaa ciidanka xoogga dalka, waxaana xukunsanaha dhabarka ka soo gaaray dhaawac ay sababeen xabado iska caabin ah oo uu riday Marxuumka ka hor inta uusan geeriyoon.
3-4 Caddow Axmed Calasow iyo Cabdiweli Sheikh Mukhtar Maxamuud ayaa lagu wada xukumnay min 8-Sano oo xabsi ciidan ah, waxayna kala ahaayeen madaxii gaadiidka ee kooxda iyo kan Caafimaadka.
5-Ibraahim Cabdullaahi Maxamed Xuseen oo lacag ka badan sedax kun dhex martay oo uu ku dabiibay xukunsaha labaad ayaa lagu xukumay 5-sano oo xabsi ciidan ah.
6-Cabdullaahi Sheekh Maxamed Hilowle oo ahaa fure hayaha guryaha qarsoon ee kooxda iyo marti geliyaha maleeshiyaadka ka soo dhaawacma kooxdan ayaa lagu xukumay 3-Sano oo xabsi ciidan ah.
Gabagabdii Warsaxafadeed kasoo baxay Maxakamada ciidamada ayaa lagu sheegay Aadan Nuunow Maxamed Kabiila iyo Dahabo Cabdi Cusmaan Maxamed ayay Maxkamaddu ku waysay wax dambi ah, waxaana dib loogu celiyay xorriyadooda.