Isniin, July 11, 2022 (HOL) - Madaxweynaha dowlad degaanka Soomaalida Mustafe cagjar, oo ka hadlayay qiimaynta xafiisyada heer degaan oo maalmahan ka socotay Jigjiga, ayaa soo hadal qaaday arrinta Warbaahinta oo uu sheegay in maamulkii isaga ka horreeyay ay laaluush ku bixin jireen sidii loo qarin dhibaatooyinkii kala duwanaa ee ka jiray degaanka Soomaalida
"Degaankan isagoo dad lagu laayo oo balaayo ka socoto, Idaacadaha geeska Africa ee Soomaaliga ku hadla degaankan wuu laaluushi jiray, BBCda wuu laaluushi jiray VOAda wuu laaluushi jiray Telefishinada qaar waa laga cabsiin jiray, sidaas darteed ama wax fiican bay ka hadli jireen ama mayna hadli jirin" ayuu yiri Madaxweyne Mustafe cagjar.
Madaxweynaha oo hadalkiisa sii wata ayaa waxa uu sheegay in maanta aysan jirin dowlad u hanjabta Warbaahinta oo laaluush siisa, balse waxa uu hadalkiisa sii raaciyay inay jiraan kuwo ku fikiraya in haddii dowladda wax laga sheego ay dowladdu afka qabanayso ciddii wax ka sheegtay ama ay laaluush siinayso, waa siduu hadalka u dhigay Madaxwaynuhu.
Waxa kale oo Madaxweynuhu sheegay in Warbaahin la laaluusho ay dhibaato u keenayso bulshada, maadaama ay Warbaahintii la laaluushay ay qarinayso dhibkii shacabka loogaystay.
Madaxweynuhu waxa kale oo uu sheegay in loo baahan yahay in la saxo Warbaahinta oo khaladaadkooda loo sheego lalana xisaabtamo, si ay usoo baxaan Warbaahin xor ah oo wanaagsan damiirna leh oo bari ka maalin haddii xukuumaddan hadda jirta dadka layso oo ay dhibaatayso laaluush aan qaadanayn, dhibka jirana aan qarin, waa siduu hadalka u dhigay Madaxwayne Mustafe cagjar.
Ugu dambayn Madaxweyne Mustafe cagjar waxa uu farriin u diray dadka ka shaqeeya Warbaahinta kala duwan ee degaanka iyo dibaddiisa ka howlgasha, isagoo sheegay in qofka Saxaafadda ka shaqeeya looga baahan yahay inuu yeesho anshixii saxaafaddu lahayd ee lagu yaqaanay.
Isu soo duuboo, wixii ka dambeeyay isbaddalkii degaanka Soomaalida iyo dalka Itoobiya ka hana qaaday, waxaa jiray isbaddalo waawayn oo dhinacyo badan ka jiray, sida Saxaafadda oo aysan horey u jirin Warbaahin si madax banaan degaanka uga hawlgasha, iyadoo hadda ay degaanka ka howlgalaan Warbaahino kala duwan oo madax banaan, xogaha degaankana siday tahay usoo gudbiya, inkastoo meelaha qaar ay wali dhaliilo ka jiri karaan.
Abdilahi Jawhar, Hiiraan Online
[email protected]