Golaha Shacabka oo berri yeelanaya kulan kaddib codsi ka yimid xafiiska Ra’iisul Wasaaraha
Axad, Luulyo, 24, 2022 (HOL) - Xildhibaannada Golaha Shacabka ee baarlamaanka Federaalka
Soomaaliya ayaa berri kulan ku leh xarunta Golaha Shacabka ee Villa Hargeysa,
kaddib codsi ka yimid xafiiska Ra’iisul Wasaaraha Xukuumadda Federaalka
Soomaaliya.
Madaxweyne Xasan Sheekh iyo Ra’iisul Wasaare Xamse ayaa
saacadihii dambe ee shalay kulan la qaatay guddoomiyaha Golaha Shacabka Sheekh Aadan
Maxamed Nuur Madoobe, iyagoona usoo jeediyay in muddo toban maalmood oo dheeraad ah loogu
daro Ra’iisul Wasaaraha si uu u sii dhammeystiro wadatashiyada ku saabsan
dhismaha Golaha Wasiirrada.
Ilo wareedyo ayaa xaqiijiyay in guddoonka codsiga Ra’iisul
Wasaaraha uu hor dhigi doono baarlamaanka.
Madaxweyne Xasan Sheekh Maxamuud ayaa 15-ka bishii
hore ee June xildhibaan Xamza Cabdi Barre oo ka tirsan xisbiga Madaxweynaha ee
UPD u magacaabay Ra’iisul Wasaaraha Xukuumadda Federaalka Soomaaliya.
Tan iyo sannadkii 1960-kii dhaqanka siyaasadda Soomaaliya
ayaa ahaa in Ra’iisul Wasaaraha uu Golihiisa Wasiirrada kusoo magacaabo muddo
30 maalmood ah, balse lama ogga waxa uu noqon doono go’aanka xildhibaannada
baarlamaanka Soomaaliya.
Hassan Istiila, Hiiraan Online
[email protected]
