Isniin, Luulyo, 4, 2022 (HOL) - Ra’iisul Wasaaraha Xukuumadda Federaalka Soomaaliya Xamse
Cabdi Barre, ayaa maanta xafiiskiisa ku qaabilay safiirka Midowga Yurub ee
Soomaaliya Tiina Intelmann.
Safiirka iyo Ra’iisul Wasaaraha ayaa kulankooda diirrada ku
saaray xoojinta mashaariicda horumarineed ee Midowga Yurub ka taageero dowladda
Soomaaliya, iyadoo lagu saleynayo howlaha hortebinta u leh dowladda.
Guddoomiyaha Midowga Yurub ee iskaashiga caalamiga ah Jutta
Urpilainen ayaa maalin ka hor shaacisay in dalalka xubnaha ka ah Midowga Yurub ay sannadkan
kordhinayaan qoondada ay siiyaan Soomaaliya iyo guud ahaan gobolka Geeska
Afrika.
Midoga Yurub ayaa sannadkan Soomaaliya siin doona ku dhowaad
140 milyan Yuuro oo lagu taageerayo dib-u-habeynta siyaasadda iyo arrimaha dhaqaallaha.
"Midowga Yurub wuxuu sidoo kale bixin doonaa €13.5
milyan oo ah taageero miisaaniyaddeed si loo joogteeyo taageerada dib-u-habaynta
siyaasada Soomaaliya iyo sidoo kale xirmo € 125 milyan oo lagu taageerayo
dowlad-dhisidda, dib-u-habeynta dhaqaalaha iyo u adkeysiga isbeddelka
cimilada," ayuu yiri Midowga Yurub.”
Hassan Istiila, Hiiraan Online
[email protected]