Dowladda Soomaaliya oo Hindia ugu baaqday inay tallaabo degdeg ah ka qaado shakhsiyaad aflagaadeeyay Nebiga (NNKH)
Khamiis, Juun, 9, 2022 (HOL) - Wasiirka diinta iyo awqaafka Soomaaliya, Sh.
Cumar Cali Rooble, ayaa sheegay dowladda Soomaaliya inay aad uga xun tahay
aflagaado ay Nabiga (nabadgalyo iyo naxariista eebbe korkiisa ha ahaatee), u
geysatay haweeney katirsan xisbiga talada haya ee dalka India.
Wasiirka Diinta ayaa sheegay inay soo dhoweynayaan
falcelinta dalalka Islaamka, kuwaas oo si weyn uga dhiidhiyay aflagaadaynta
Nebiga islamarkaana safiiradahoodii si degdeg ugala soo noqday Hindia.
Xisbiga talada dalka Hindia ee BJP ayaa shaqada ka joojiyay
haweeneyda ku kacday falkan. Waxaa kaloo isna shaqada laga joojiyay madaxa
qaybta warbaahinta Delhi ee xisbiga, Naveen Kumar Jindal, kaddib markii uu
dadka la wadaagay sawirka aflagaadada ah.
“Waa in si degdeg ah dowladda Hindia arrintaan ay raalli uga
bixisaa. Waa inay sharciga waafijisaa shakhsiyaadka xumahaas gestay, laguma
qanci karo in la yiraahdo “xilkaan ka qaadnay”, ayuu yiri wasiirku.
Wuxuu wasiirku sheegay in dowladda Soomaaliya ay howlan
tahay sidii ay jawaab ku haboon uga bixin lahayd aflagaadada loo geystay
Nebiga.
Abdiweli M. Sheikh, Hiiraan Online
[email protected]
