Sabti, April, 22, 2023 (HOL) - Warar dheeraad ah ayaa kasoo baxaya khasaaraha ka dhashay weerar qaraxyo ku bilaawday oo ay kooxda Shabaab ku qaaday deegaanka Masagawaay ee gobolka Galgaduud aroornimadii hore ee saakay.
Weerarka oo ahaa mid culus ayaa geystay khasaare isugu jira dhimasho iyo dhaawac kala gaaray labada dhinac, hayeeshee aanan xaqiijin karin inta uu dhan yahay, iyadoo wararka hordhaca ah ee laga helayo khasaaraha ka dhashay weerarka ay sheegayan iney ku dhinteen ku dhawaad 10 ruux oo isugu jira odayaal dhaqameed iyo askar.
Nabadoonada weerarka Masagawaay ku dhintay ayaa waxaa ka mid ah Nabaddoon Cismaan Macalin, Nabaddoon Ibraahim Maxamed iyo Nabddoon Cabdulle Geeljir, kuwaas oo ka mid ahaa Nabadoonada ugu caabsan ee kasoo jeeda deegaanka Masagawaa.
Jenaraal Tareedisho oo kamid ah saraakiisha ciidamada ayaa Warbaahinta u sheegay in kooxda Al-Shabaab weerarka ay kusoo qaadeen Masagawaay uu ahaa mid kooxda ay ku fashilantay damacooda oo ahaa inay qabsadaan magaalada, islamarkaana wali deegaanka ay gacanta ku hayaan ciidamada dowladda iyo dadka deegaanka.
Jeneraalka oo ku sugan goobta dagaalka ka dhacay ayaa sidoo kale sheegay iney dileen 18 ka tirsan dagaal yahanadii kooxda ee weerarka kusoo qaaday deegaanka Masagaaaa.
"Khawaarijta oo aanan awoodin inay dagaal toos ah kala hor yimaadaan geesiyaasha Xoogga Dalka ayaa Qaraxyo waxay ku soo xireen kuwa ay qaldeen, laakiin naftood hurayaasha Ciidanka deegaanka ayaa hor istaagay damaca Khawaarijta" ayaa yiri Jenaraal Tareedishe.
Weerarkan aroornimadii hore ee saakay ka dhacay Masagawaay ayaa kusoo beegmaya laba maalin kadib weerar noocaan oo kale ah oo ay Al-shabaab ku qaaday deegaanka Budbud ee Galgaduud oo dhawaan uun Al-shabaab lagala wareegay.