Arbaco, April, 26, 2023 (HOL) - Ganacsade Yemeni ah iyo 3 qof oo qoyskiisa ka mid ahaa ayaa ku geeriyooday shil baabuur oo ka dhacay wadada isku xidha Hargaysa iyo Berbera.
Saami Al Xaydari oo ahaa nin ganacsade ah oo Yemeni ah, oo aad looga yaqaanay magaalada Hargaysa, xaaskiisii, ilmo yar oo uu dhalay iyo gabadh kale oo ay qaraabo ahaayeen ayaa ku geeriyooday shilka.
Al Xaydari iyo xubnaha qoyskiisa ayaa aas loogu sameeyay magaalada Hargaysa, isla markaana dadka aaska kasoo qaybgalay oo ay ku jireen masuuliyiin ka tirsan xukuumada Somaliland ayaa ka hadlay shakhsiyadii Al Xaydari.
"Nin dadka oo dhan u dhow ayuu ahaa, oo markasta oo lala kulmo, waji san, walaalnimo iyo cibaado ayuu lahaa, masiibada ku timid qoyska dhan, waxan ka codsanayaa dhamaan wixii codkaygu gaadho in ay taageero usoo fidiyaan" Wasiirka Diinta iyo Awqaafta Somaliland Sh. Cabdirisaaq Xuseen Albaani oo aaska kasoo qaybgalay ayaa sida yidhi.
Dhibaatada ay shilalku gaystaan ayaa sannadkasta kor u kacda xiliyada lagu jira munaasibadaha ciida, oo ay dadku safaro dalxiis u badan sameeyaan.
Xukuumada Somaliland ayaa digniin kasoo saartay khatarta ay baabuurta tirada badan ee safarada loo adeegsado xiliyada munaasibaduhu ay sababi karaan.