Khamiis, April, 27, 2023 (HOL) - Ka bixitaanka Ciidamada nabad ilaalinta Midowga Afrika ee Soomaaliya (ATMIS) ayaa billaaban doonta bartamaha sanadkan, sida ay sheegeen dalalka ay ciidamada ka joogaan Soomaaliya.
Sida ku cad Qaraarka 2670 (2022), Golaha Ammaanka ee Qaramada Midoobay wuxuu si wada jir ah u taageeray go'aanka Midowga Afrika ee ah in la qaato hab istiraatijiyadeed oo ku aaddan dhimista ATMIS iyo ilaalinta taariikhda bixitaanka ATMIS ee 31ka Diseembar 2024.
Kulan ay magaalada Kampala ku yeelanayaan mas’uuliyiinta dalalka ay ciidamada ka joogaan Soomaaliya ayaa lagu qiimeyn doonaa sida ay ugu diyaarsan yihiin ciidamada ammaanka Soomaaliya si ay mas’uuliyadda amniga ugala wareegaan ciidamada Midowga Afrika, iyadoo la eegayo dhinacyada ugu muhiimsan oo ay ka mid yihiin abuurista ciidamada iyo taageerada saadka.
Dalalka ciidamadooda iyo agabka ay ku bixinayaan howlgalka ayaa kala ah Burundi, Jabuuti, Itoobiya, Kenya iyo Uganda.
Hawlgalka Ku-meel-gaarka ah ee Midowga Afrika ee Soomaaliya (ATMIS), waa hawlgal dhinacyo badan leh (militari, boolis iyo rayid), waxaana oggolaaday Midowga Afrika, waxaana u xilsaaran Golaha Ammaanka ee Qaramada Midoobay.