Khamiis, April, 27, 2023 (HOL) - Warar dheeraad ah ayaa kasoo baxaya dagaal u dhaxeeya laba Maleeshiyo Beeleed oo walaalo ah oo Maanta ka dhacay deegaanka Afar irdood ee gobolka Hiiraan.
Dagaalka ayaa geystay khasaare isugu jira dhimashada ilaa shan ruux oo labada dhinac ah iyo dhaawaca ku dhawaad 10 ruux oo kale, sida ay Shabakada HOL u xaqiijiyeen ilo dadka deegaanka ah.
Dagaalka ayaa ahaa mid salka ku haayay weerar gaadmo ahaa oo laba cisho ka hor ka dhacay deegaan dhaw degmada Matabaan ee gobolka Hiiraan oo lagu dilay laba ruux oo xoolo dhaqato ahaa.
Xubno ka tirsan maamulka gobolka Hiiraan oo ku baxay joojinta xiisada ka dhalatay weerarka habeen hore lagu dilay labada ruux ayaa ku guul dareystay iney xal helaan xiisada u dhaxeysa labada Maleeshiyo beeleed ee kasoo kala jeeda beelaha Xawaadle iyo Habargidir oo uu Maanta dhexmaray dagaal qaraar.
Xubno ka mid ah maamulka gobolka Hiiraan, kan degmada Matabaan iyo saraakiil ciidan oo gaaray goobaha lagu dagaalamay Maanta ayaa waxay sheegeen iney ka xun yihiin in lagu kor dagaalamo, waxayna ku baaqeen in si deg deg ah loo joojiyo dagaalka u dhaxeeya labada Maleeshiyo beeleed ee walaalaha ah.
Dagaal beeleedka Maleeshiyaadka Xawaadle iyo Habargidir ayaa ah mid soo laablaabtay, iyadoo ay xusid mudan tahay in tiro dhowr jeer oo hore beelahaan la dhex dhigay heshiisyo lagu dhameynayo colaadooda, kaasoo aanan si rasm ah u miro dhalin mar walba.