Isniin, February, 6, 2023 (HOL) - Garaadka guud ee beelaha gobolka Sool iyo qaybo kamid ah Sanaag iyo Cayn, ayaa ciidamada Somaliland ku eedeeyay in ay madaafiic cul-culus ku garaaceen Laascaanood.
Garaad Jaamac Garaad Cali, oo waraysi gaar ah siiyay Cabdirisaaq Catoosh, ayaa sheegay in ciidamada Somaliland ay iyagu saaka weerarka bilaabeen, waxaanu ku eedeeyay in ay hoobiyayaal ku garaaceen magaalada.
"Banaanka ayay xabadu ka dhacaysa magaalada way ku hareeransanyihiin, hareerayn kaliya maahee waxay ku garaacayaan huubiyayaal dhowr guri ayay ku dhaceen, caruura ayaa ku dhintay iyo dad waayeel ah, gurya ku gubtay" ayuu yidhi Garaad Cali.
BBC-da ayaa sheegtay in mid kamid ah hoobiyayaasha laysku adeegsaday saaka uu ku dhacay guri dad shacab ahi daganaayeen, kadibna 7 qof oo isku qoysa isbitaalka loola cararay, BBC-du ma xaqiijin in hoobiyuhu uu dhimasho sababay iyo in kale.
Dhawaqa xabada ayaa laga maqlayaa duleedka magaalada Laascaanood, halkaasi oo ciidamada Somaliland ay fadhiisimo ku leeyihiin, sidookale xukuumada ayaa sheegtay in ciidamadu ay xeryahooda ku suganyihiin oo ay is difaacayaan.
Hadaba, ma jiraan ilo madaxbannan oo ilaa hada xaqiijin kara sida ay wax u socdaan, marka laga yimaado eedaynta ay labada dhinac isku jeedinayaan.
Abdilahi Geel-maal, Hiiraan Online
[email protected]