Talaado, February, 7, 2023 (HOL) - Madaxweynaha dowladda Fedaraalka Soomaaliya Xasan Sheekh Maxamuud ayaa ku baaqay in deg deg loo joojiyo dagaalka ka socda magaalada Laascaanood ee xarunta gobolka Sool.
Madaxweyne Xasan Sheekh ayaa ugu horeyn tacsi u diray ehalada dadkooda ay dhibaatada kasoo gaartay dagaalka ka socda Laascaanood, isagoona adkeeyay muhiimada ah in la tixgaliyo rabitaanka shacabka ku nool deegaanada Sool iyo Sanaag xalkana uu ku jiro wadahadal iyo isku tanaasul si xal looga gaaro xiisadaha siyaasadeed.
“Mushkiladda ka taagan gobolada Sool iyo Sanaag xalkeeda waa xal Siyaasadeed in si siyaasadeed loo xaliyo, sidaas daraadeed waxa meeshaas ka dhacay waan ka xunahay raali kama nihin, in maanta dadka rabitaankooda Qori lagu xaliyo suura gal maahan” ayuu yiri Madaxweyne Xasan Sheekh Maxamuud.
Madaxweynaha Soomaaliya ayaa nasiib daro weyn ku tilmaamay dhibaatada mudada dheer ka taagan magaalada laascaanood ee sababtay in dhiig badan uu ku daato, wuxuuna dalbaday in wadahadal la isugu yimaado oo uu diyaar u yahay dhankiisa inuu ka qeyb qaato xalka Laascaanood meel walba oo lagu qabanayo.
"Walaalayaal Xalka marnaba kuma imaanayo qori, in Boqolaal iyo kumanaan qof dilno kadib korkooda aan isku gacan salaano oo aan dhahno nabadaa ka dhali waa laga roonyahay, Odayaasha dhaqanka ha qaataan kaalinta ay leeyihiin oo ah kaalin nabadeed, haddana ay qaateen, waana ku boggaadinayaa" ayuu yiri madaxweyne Xasan Sheekh Maxamuud.
Baaqaan kasoo baxay madaxweyne Xasan Sheekh ayaa imaanaya, iyadoo maalintii labaad uu galay dagaalka ka socda magaalada laascaanood ee xarunta gobolka Sool.