Jimco, January, 13, 2023 (HOL) - Madaxweynaha dowladda Fedaraalka Soomaaliya Xasan Sheekh Maxamuud oo ka qeyb galay Banaanbax ka dhacay magaalada Muqdisho oo ka dhan ahaa kooxda Al-Shabaab ayaa ka hadlay arrimo badan oo la xariira dhibaatooyinka ay geysteen kooxda Shabaab.
Madaxweyne Xasan Sheekh ayaa xusay dhibaatooyinkii lama ilaawaanka ah oo ay kooxda u geysteen dadka Soomaaliyeed iney ka mid ahayeen qaraxyadii Hotel Shaamoow, Hargaha iyo Saamaha, Soobe1 iyo Soobe 2, Ex koontarool afgooye iyo gumaad wadeerdyo badan ay kooxdu ku gumaadeen arday, culimmo, haween, dhakhaatiir iyo haldoor badan oo Soomaaliyeed oo waxtar u lahaa dalka.
“Shabaab waa Kalluun ay biyihii ka gureen, waxa ay ku dhex dhuumanayeen shacabka Soomaaliyeed, iyagiina waa diideen oo intaas ka badan uma dulqaadan karaan gumaad, baad iyo cabburin. Nimankan Alshabaab ah ilaa aad iska dhiciso kuuma arkayaan dad in aad tahay ee waxay kuu haystaan badeecad yar oo iyagu leeyihiin in aad tahay" ayuu yiri madaxweynaha Soomaaliya Xasan Sheekh Maxamuud.
Madaxweyne Xasan Sheekh ayaa sidoo kale sheegay in dowladiisa aysan wax cudur daar ah ka aqbali doonin dadka lacagaha baada ah siiya Ururka Shabaab.
“Kuwa lacagta baadda ah siiya Khawaarijta cudur-daar malahan. Dowladdu dhawaan waxa ay soo bandhigidoontaa Xisaabaad badan oo Khawaarijta dhaqaale loogu dirayay, Taleefanno badan oo lacag looga xawilay iyo Tallaabooyin kale oo loo qaaday dagaalka ka dhanka Dhaqaalaha Khawaarijta" ayuu yiri Madaxweyne Xasan Sheekh Maxamuud.
Gabagabadii madaxweynaha Soomaaliya ayaa shacabka ku nool caasimadda ku booriyey baraarugga ay muujiyeen ee ka dhan ah Ururka Al-Shabaab iyo garab istaagga halganka xoreynta dalka, wuxuuna kula dardaarmay guud ahaan shacabka Soomaaliyeed iyo dadka Caasimadda iney la shaqeeyaan laamaha amniga ayna soo gudbiyaan xogta Al-shabaabka ku dhex dhuumaaleysanaysa guryahooda iyo ganacsiyadooda, si looga hortago gumaadka iyo dhibaatooyinka ay soo maleegayaan.