Jimco, Maarso, 24, 2023 (HOL) - Warar dheeraad ah ayaa kasoo baxaya dagaal Xalay ku dhexmaray duuleedka degmada Deyniile ee magaalada Muqdisho, gaar ahaan halka loo yaqaano beerta Cali Mahdi ciidamada Booliiska sida gaarka ah u tababaran ee Haramcad iyo kuwa kooxda Al-shabaab oo halkaasi xarumo ku lahaa.
Dagaalka ayaa yimid kadib markii ciidamada Haramcad weerar dhowr jiho ah ay ku qaadeen xarumo kooxda shabaab ku laheyd Beerta Cali Mahdi ee ku taala duuleedka degmada Deyniile ee magaalada Muqdisho.
Dagaalka ayaa la sheegay inuu ahaa mid aad u xoogan oo socday ku dhawaad hal saac oo xiriir ah, kaasoo jugta hubka la isku adeegsanaayay laga maqlaayay meelo ka fog fog halka uu dagaalka ka dhacay, hayeeshe lama oga khasaaraha rasmiga ah ee ka dhashay dagaalka dhexmaray ciidanka Haramcad iyo Al-shabaab.
Taliska ciidamada Booliiska Haramcad ayaa sheegay in weerarka Xalay ay ku qaadeen xarunta Al-shabaab ay ku laheyd duuleedka degmada Deyniile iney ku jebiyeen Al-shabaabkii halkaasi ku sugnaa walow aysan shaacin khasaaraha rasmiga halkaasi ka dhashay.
"Ciidamada Haramcad waxay Cawa oo Jimco ah weerar lixaad leh ku qaadeen Saldhiga Ay Ururka Al-Shabaab ay dhawaan ka samaysteen Berta Ali Mahdi ee duleedka Degmada Deyniile Ee Gobolka Banaadir , Halkaas waxaa ku sugnaa ciidamo kala duwan oo kuwa nabadiidka ah, Weerarka oo billawday xilligii salaada Cishaha kadib waxaa ay ciidamada Mujaahidiintu dhawr jiho ka weerareen fariisimayaasha cadawga ee Beerta Ali Mahadi waxaana Ilaahay mahadiis dagaal xooggan kadib ciidamada Tawxiidka u suurtagashay inay jebiyaan maleeshiyadii kooxda Al shabaab" ayaa lagu yiri qoraalka kasoo baxay Taliska ciidanka Booliiska ee Haramcad.
Ma ahan markii ugu horeysay oo ay ciidamada Booliiska Haramcad weerareen xarumo ay Al-Shabaab ku leeyihiin beerta Cali Mahdi ee duuleedka degmada Deeyniile, waxaana tiro dhowr jeer oo hore halkaasi weeraro ku qaaday ciidamada Haramcad iyo kuwa NISA, hayeeshe mar walba dib uga soo laabanaayay.