Talaado, Maarso, 28, 2023 (HOL) - Golaha Ammaanka ee Qaramada Midoobay ayaa maanta isugu imaanaya dood heer sare ah oo looga gol leeyahay ka hortagga xagjirnimada rabshadaha wata ee Afrika iyadoo la kordhinayo wadashaqeynta QM, Midowga Afrika (AU), iyo ururrada gobolka.
Warbixin ay dhawaan soo saartay Qaramada Midoobay ayaa lagu muujiyay sida xawliga ah ee argagixisadu ugu faafsanayso Afrika, taasoo abuurtay walaac weyn.
Madaxweynaha Mozambique Filipe Nyusi ayaa hoggaamin doona kulanka, isagoo diiradda saaraya sidii loo ogaan lahaa fursadaha iskaashiga cutubka VIII ee Axdiga Qaramada Midoobay si loo taageero.
Goluhu wuxuu ka doodi doonaa afar qodob oo muhiim ah inta dooddu socoto:
Horumarinta dhaqamada waxtarka leh.
Kordhinta iskaashiga caalamiga ah.
Dhiirigelinta hindisayaasha horumarineed.
Habaynta istaraatiijiyadda la dagaalanka argagixisada caalamiga ah si loo daboolo baahiyaha gaarka ah ee Afrika.
Doodda ayaa lagu soo bandhigi doonaa hindiseyaal kala duwan oo Afrikaan ah oo looga hortagayo argagixisada, sida Ciidanka Isku dhafka ah ee Kooxda Shanta ah ee Sahel (FC-G5S), Hawlgalka Ku-meel-gaarka ah ee Midowga Afrika ee Soomaaliya (ATMIS), Ciidanka Isku-dhafka ah ee Caalamiga ah (MNJTF), Hindisaha Accra, iyo Nouakchott.
Talaadadii, golaha ammaanka ayaa yeeshay kulan gaar ah oo lagu qiimeynayo xaaladda amniga Soomaaliya, isla markaana dib u eegis loogu samaynayo habsami u socodka Qorshaha Kala-guurka ee Soomaaliya (STP) iyo Nashqada Amniga Qaranka (NSA).
Wakiillo ka kala socday AU, EU, Somalia, iyo ATMIS-ka dalalka ay ciidamada ka joogaan Soomaaliya ayaa ka qeyb galay, iyagoo ka wada hadlay howlgallada ka dhanka ah Al-shabaab ee socda iyo qorshaha bixitaanka 2,000 kamid ah askarta ATMIS bisha June.
Hoos-u-dhaca dhaqaale ee ATMIS ayaa sidoo kale looga hadlay kulankaas, iyadoo Midowga Afrika uu ka codsaday saaxiibada labada dhinac iyo kuwa caalamiga ahba in la helo maalgelin $90 milyan ah.
Midowga Yurub ayaa 143 milyan oo Yuuro ku taageeray ATMIS iyo Ciidanka Xoogga Dalka Soomaaliyeed (SNA), halka Mareykanka, Shiinaha, iyo waddamada Khaliijka la filayo inay sidoo kale gacan ka geystaan.