Sabti, Agoosto, 10, 2024 (HOL) - Madaxweynaha dowladda Fedaraalka Soomaaliya Xasan Sheekh Maxamuud ayaa khudbad uu jeediyay kaga hadalay arrimo badan oo ay ka mid yihiin doorashooyinka dalka, dagaalka ka dhanka ah Al-shabaab iyo cabashada la xariirta dhaqaale xumo oo maalmahan laga hadal haayay Muqdisho.
Madaxweyne Xasan Sheekh oo ku dheeraaday ka hadalka arrimaha doorashooyinka dalka ayaa sheegay in dalka uu galayo doorasho qof iyo cod ah oo aysan jirin wax ka noqosho ama ka tanaasulid ah, wuxuuna ku celceliyay iney ka go'an tahay dowladiisa qabashada doorasho qof iyo cod ah.
“Dalka Soomaaliyeed Doorasho qof iyo cod ah ayuu galayaa ka noqosho malahan dib uga dhicid iyo ka tanaasulid malahan,dadka soomaaliyeed ayaa codeynaya intii la gaari karo, waxaan rabnaa in dhowr malyan oo Soomaali ah inay codeeyaan oo ay doortaan golaha deegaanka amaba xildhibaanada baarlamaanka, waa suurtogal inay dhowr malyan ay codeeyaan" ayuu yiri Madaxweyne Xasan Sheekh.
Wuxuu sidoo kale madaxweynaha Soomaaliya khudbadiisa kaga hadlay dagaalka ka dhanka ah Al-shabaab oo uu sheegay in dowladiisa muhiimad gaar ah ku bixineyso, wuxuuna xusay in marnaba uusan joogsan doonin dagaalka dalka looga ciribtiraayo kooxda.
“Umadda Soomaaliyeed waxaan u sheegayaa dagaalka Khawaarijta weli waa muhiimadeena koowaad, mana istaagin oo waa socdaa, mana istaagayo ilaa dalkaan laga xoreeyo argagixisada, gaadmo waa sameeyaan mar kasta oo Khawaarijta waa dhaqankeeda, laakiin aad ayaa looga taxadaraa amniga" ayuu yiri madaxweyne Xasan Sheekh Maxamuud.
Waxyaabaha madaxweyne Xasan Sheekh khudbadiisa uu kaga hadlay waxaa ka mid ahaa cabasho maalmahii lasoo dhaafay kasoo yeeray dhalinyarada ku nool Muqdisho, taasoo la xariirtay Shiid ama dhaqaale xumo.
“kuwa maanta dhaqaale la’aanta ka cabanaya waxay isugu jiraan kuwii khawaarijta lacagta u aruurin jiray, kuwii baraha bulshada dadka ka caayi jiray iyo kuwii wax xadi jiray" ayuu yiri Madaxweyne Xasan Sheekh.
Ugu dambeyntii madaxweyne Xasan Sheekh ayaa sheegay in magaalada Muqdisho ay sameyn hayso hormar xoog leh oo muujineysa in dhaqaalaha dalka uu soo kabanayo, wuxuna tusaale u soo qaatay dhismayaasha guryaha, dabaqyada, filooyinka iyo jidadka laamiyada ah ee ka socda Muqdisho iyo magaalooyinka kale oo ay ka mid yihiin Kismaayo, Dhuusamareeb, Baydhaba iyo Jowhar.