Sabti, October, 16, 2024 (HOL) - Hay’adda Isgaarsiinta Qaranka Soomaaliya ayaa billowday baaritaan ku aaddan in si lama filaan ah loo waayay akoonnada Facebook-ga ee ay leeyihiin shaqsiyaadka dhaliila dowladda. Dhacdadan ayaa dhalisay walaac ku saabsan ku lug lahaanshaha dowladda, inkastoo saraakiisha ay beeniyeen sheegashadaas.
Mustafe Sheekh, Agaasimaha Guud ee Hay’adda NCA, ayaa sheegay in dhibaatadu ay tahay mid baahsan, isla-markaana ay saamaysay Madaxda Maamul Goboleedyada, Suxufiyiinta, iyo Wasiirada.
“Si buuxda ayaan uga warqabnaa arrinta. Waxay noqonaysaa mid baahsan waxayna saameyn ku yeelatay madaxweynayaasha dowlad goboleedyada, suxufiyiinta, iyo wasiirada. Waxaan wadahadal kula jirnaa shirkadda Meta oo ku saabsan sidii kor loogu qaadi lahaa xeerarka ku saabsan Facebook si looga hortago si xun u isticmaalka baraha bulshada,” ayuu yiri agaasimaha isgaarsiinta.
"Iyadoo ku dhawaad 5 milyan oo isticmaale Facebook ah ay ku sugan yihiin Soomaaliya, waxaan ku wargelinay baahida loo qabo in la sameeyo ilaalin si looga hortago in mustaqbalka si xun loogu isticmaalo hababka warbixinnada Facebook, taasoo haddii kale meesha ka saari karta kalsoonida shacabka ee Facebook," ayuu yiri Mustafa.
Facebook ayaa weli ah mid ka mid ah aaladaha ugu caansan Soomaaliya, iyadoo isticmaalayaashu ay ku badan yihiin warbaahinta, kooxaha xuquuqda madaniga ah, iyo dadweynaha guud.
Dhowr maalin kahor, qaar kamid ah dadka caanka ka ah baraha bulshada oo ay ku jiraan suxifiyiin, siyaasiyiin iyo madaxweynayaasha dowlad goboleedyada ayaa hawada laga saaray akoonada ay ku lahaayeen Facbook, inkastoo qaar kamid ah ay hawada dib ugusoo laabteen.