Hiiraan Online

 

Jimco, November, 29, 2024 (HOL) - Ciidanka Nabadsugida Iyo Sirdoonka Qaranka Soomaaliyeed ee NISA oo kaashanaya kuwa Kumaandooska Gorgor ayaa howlgalo ka dhan ah kooxda Al-shabaab ka fuliyay deegaano ka tirsan gobolka Shabeeladda dhexe.

Ciidamada is garabsanaya ayaa howlgalka kula wareegay deegaanka Shanloow iyo tuulooyin dhowr ah oo hoostaga oo ay ku sugnayeen xubno ka tirsan Ururka Al-shabaab.

Sarkaal ka tirsan ciidanka NISA oo la hadlay warbaabinta Qaranka ayaa sheegay in howlgalada ay ku dileen xubno isugu jira horjoogayaal iyo maleeshiyaad ka tirsanaa kooxda, hayeeshee sarkaalka ma uusan sheegin inta ay dhan tahay tirada Al-shabaab ay uga dileen howlgalada.

Wuxuu sidoo kale sheegay sarkaalka NISA u hadlay in sidoo kale ciidamada is kaashanaya ay burburiyeen saldhigyo ay halkaas ku lahayeen kooxda oo ay ku dhibaateyn jireen shacabka Soomaaliyeed.

Gobolka Shabeellaha dhexe waxa uu ka mid yahay gobolada ay wali ka socdaan howlgalada lagu doonayo in guud ahaan dalka looga xureeyo kooxda Al-shabaab ee dagaalka kula jirta dowladda Fedaraalka Soomaaliya.