Hiiraan Online

 

Sabti, November, 30, 2024 (HOL) - Warar dheeraad ah ayaa kasoo baxaya khasaaraha ka dhashay dagaal qaraar oo galinkii dambe ee Shalay ku dhexmaray laba maleeshiyo beeleed xadka ay wadaagaan gobolada Hiiraan iyo Shabeellaha dhexe.

Dagaalkaan u dhaxeeyay labada maleeshiyo beeleed oo kala ah Xawaadle iyo Abgaal ayaa si gaar ah uga dhacay deegaanka Ceeldheere oo dhaca xadka labadaani gobol.

Wararka hordhaca ah ayaa sheegaya in dagaalka ay ku dhinteen ilaa 6 ruux oo isugu jira labada dhinac, islamarkaana ay ku dhaawacmeen dad kor u dhaafaya 10 ruux oo kale.

Wararkii ugu dambeeyay ayaa sidoo kale sheegaya in saakay wali xaalada deegaanka ay tahy mid aad u kacsan, maadama ay wali is  horfadhiyana maleeshiyaadka labada beelood ayna qadaan dhaq dhaqaaqyo xoog leh oo iska soo horjeedo.

Dagaalkaan dib uga dhex qarxay labadaan beelood ayaa kusoo aadaya, iyadoo maalmahii lasoo dhaafay ay socdeen dadaalo nabadeed oo lagu doonayay in lagu qaboojiyo xiisada beelahaan taaso noqotay mid guul darreystay.