Arbaco, April 2, 2025 (HOL) - Wasiirka wasaaradda Arrimaha Dibadda Soomaaliya Axmed Macalim Fiqi ayaa hambalyo waxa uu u diray dhigiisa Dalka Jabuuti Cabduqaadir Xuseen Cumar oo shalay loo magacaabay inuu noqdo wasiirka cusub ee wasaaradda arrimaha Dibadda ee Jabuuti.
Wasiir Fiqi, ayaa teleefoonka kula hadlay gelinkii dambe shalay oo Talaado ahayd, Wasiirka cusub ee Arrimaha Dibadda iyo Iskaashiga Caalamiga ee Jabuuti, Danjire Cabdulqaadir Xuseen Cumar, isaga oo u jeediyay hambalyo diirran oo ku aaddan xilka loo magacaabay.
Qoraal kooban oo kasoo baxay Wasaaradda arrimaha dibadda Soomaaliya ayaa lagu sheegay in Intii khadka isgaarsiinta lagu wadahadlayay, Wasiir Fiqi waxa uu adkeeyay qoto-dheerida xiriirka taariikhiga ah ee walaalnimo iyo kan diblomaasiyadeed ee xooggan ee u dhexeeya Soomaaliya iyo Jabuuti.
Sidoo kale waxa Wasiirka arrimaha dibadda Soomaliya Axmed Fiqi u caddeeyay dhigiisa Jabuuti aragti-wadaagga dhanka iskaashiga iyo horumar is-dhaafsiga iyo kalsoonida uu ku qabo hoggaaminta Wasiirka Jabuutiyaanka ee xoojinta xasilloonida gobolka iyo sare-u-qaadidda dano-wadaagga.
Labada Wasiir ayaa waxa ay fallanqeeyeen hore-u-dhaqaajinta xiriirka labo geesoodka iyo is-gaashaanbuursiga fagaarayaasha gobolka iyo kuwa caalamiga iyo kor-u-qaadidda wax-wadaagga istiraatiijiyadeed.
Danjire Cabdulqaadir Xuseen Cumar oo horey usoo noqday safiirka Dowladda Jabuuti ee dalka Kuwait ayaa bedalaya Wasiirkii hore ee arrimaha dibadda ee Jabuuti ee loo doortay Guddoomiyaha Ururka Midowga Africa Maxamuud Cali Yuusuf.