4/3/2025
Today from Hiiraan Online:  _
Wararka Maanta- Arbaco, Apr 2 , 2025
Faahfaahino kasoo baxaya dagaal culus oo ka socda Galbeedka gobolka Mudug
 

Arbaco, April 2, 2025 (HOL) - Wararka ka imaanaya gobolka Mudug ayaa sheegaya inuu haatan dagaal beeleed xoogan uu ka socdo inta u dhaxeysa deegaanada Jiicboor iyo Saax qurun oo dhaca Galbeedka gobolka Mudug.

Dagaalkaan oo u dhaxeeya laba maleeshiyo oo kasoo kala jeeda maamulada Puntland iyo Galmudug ayaa lasoo warinaya inuu yahay mid aad u xoogan oo labada dhinac ay isku adeegsanayaan hubka noocyadiisa kala duwan.

Warar soo baxaya ayaa sheegaya in dagaalka uu sababay khasaare isugu jira dhimasho iyo dhaawac kala gaaray labada dhinac, hayeshee wali lama haayo tirada rasmiga ah.

Odayaal iyo waxgarad kasoo kala jeeda beelaha dirirtu u dhaxeyso ayaa bilaabay dadaalo ay ku doonayaan in nabad lagu kala dhex dhigo labada maleeshiyo beeleed ee ku dagaalamaya galbeedka Gobolka Mudug.

Ugu dambeyntii ma jirto wax war ah oo kasoo baxay dhanka laamaha amaanka maamulada Puntland iyo Galmudug oo ku aadan dagaal beeleedka dib uga qarxay deegaanada ku yaala Galbeedka gobolka Mudug.

Lasoco wixii kusoo kordha warkaan.