Arbaco, April 2, 2025 (HOL) - Wararka ka imaanaya dalka Kenya ayaa sheegaya in Maxkamad ku taalla magaalada Wajeer ee gobolka Waqooyi Bari Kenya, ay kasoo muuqdeen saddex nin oo Soomaali ah, kuwaas oo looga shakisanyahay dilka gabar 17 sano jir ahayd, taas oo todobaadkii la soo dhaafay lagu dilay magaaladaas.
Gacala Aadan ayaa ahayd xaaska mid kamid ah ragaas maxkamada lasoo taagay ee loo haysto dilka Gabadha, waxaana Gabadhaan dilkeeda argagax badan ku abuuray dadka deegaanka, maadaama sida la sheegay jirkeeda dab la qabadsiiyay ka dib markii la dilay, waxaana ay noqotay dhacdo ay si weyn Bulshada uga argagaxeen.
Raggan oo la soo xiray todobaadkii la soo dhaafay markii uu dilka dhacay, ayaa la hor keenay maxkamadda Wajeer si su'aalo looga weydiiyo kiiska lagu soo eedeeyay, balse dhageysiga kiiskooda ayaa dib loogu dhigay 14 maalmood kadib codsi ka yimid qareenada u doodaya eedeysaneyaasha, si loo dhameystiro baaritaanada socda, waxaana intaas lagu sii heyn doonaa xabsiga magaalada Wajeer.
Qaar kamid ah mas'uuliyiinta magaaladaas iyo kooxaha u dooda xuquuqda aadanaha, ayaa ku baaqay in tallaabo degdeg ah oo sharciga waafaqsan laga qaado cidda ay ku cadaato inay falkan geysatay, Gabadha oo lagu magacaabo Gacala Aadan, ayaa waxaa loo guuriyay nin da'a ahaan ka weyn, oo ku dhowaad 60 sano jir ah, sida ay BBC-du u sheegtay hooyada dhashay gabadha la dilay.
Gabadha oo ahayd curad, ayaa waxay ka soo jeedday xerada qaxootiga Dhagaxleey ee dalka Kenya, halkaas oo qoyskeedu kula noolayd waxna ku baraneysay.