Khamiis, April 3, 2025 (HOL) - Dowladda Soomaaliya ayaa maalqabeen Elon Musk iyo wadaadada diinta Masiixiga ee Maraykanka ka codsatay in ay Donald Trump ku qanciyaan in aanu aqoonsan Somaliland.
Warbixin ay baahisay jariidada The Africa Report ayaa lagu yidhi, "Muqdisho waxa ay la xidhiidhaysaa Elon Musk iyo ururrada diinta ee midigta, xilli uu Donald Trump ku foogan yahay dib u eegista siyaasadda Maraykanka ee Geeska Afrika."
Warbixintu waxay sheegtay in dowladda Soomaaliya ay isku dubaridday olole ay kaga hortagayso dhaqdhaqaaqa aqoonsi raadinta Somaliland ee ka socda Maraykanka, iyada oo kiraysatay kooxo ka caawinaya dadaallada ay ugu jirto in aan Somaliland la aqoonsan.
"Waxay isku dayaysaa in ay la xidhiidho Trump, kaasi oo aanu xidhiidh fiicani kala dhaxayn, iyada oo kiraysatay kooxo ka caawinaya arrintan, isla markaana la tashanaysa shakhsiyaad ku dhow 'Mashruuca Ka Dhigista Maraykanka Mid Xooggan Markale’ (MAGA)," ayaa lagu yidhi warbixinta.
Sida ay dhawaan baahiyeen jariidadaha Semafor iyo Reuters, Madaxweynaha Soomaaliya, Xasan Sheekh Maxamuud, ayaa waraaq uu u diray Donald Trump ugu soo bandhigay in uu la wareego maamulka dekedaha iyo madaarrada Berbera iyo Boosaaso, si uu uga hortago in Washington ay Somaliland aqoonsato.
Danjiraha Soomaaliya u fadhiya Maraykanka, Dahir Hassan Abdi, ayaa dhaqdhaqaaqa aqoonsi raadinta ee Maraykanka ka socda ku tilmaamay mid, haddii uu dhab noqdo, xumayn kara xidhiidhka Washington iyo Muqdisho.
Dadaallada aqoonsi raadinta Somaliland waxaa wada siyaasiyiin iyo xildhibaano ka tirsan xisbiga Jamhuuriga ee uu Trump hoggaamiyo, kuwaasi oo sheegay in Somaliland ay tahay dimuqraadiyadda keliya ee ka jirta gobolka, isla markaana ay tahay cidda keliya ee hirgalin karta danaha Washington ee gobolka, maadaama ay nabad tahay, goobta ay ku taallaana ay muhiimtahay.
Xukuumadda Somaliland ayaa sheegtay in ay ka rajo qabto in Washington ay u aqoonsato dal madaxbannaan, iyada oo Wasiirka Arrimaha Dibadda, Cabdiraxmaan Daahir Aadan, uu shalay Maraykanka u tagay si uu u dardar-geliyo hawlaha aqoonsi raadinta.