Arbaco, January 15, 2025 (HOL) - Warar dheeraad ah ayaa kasoo baxaya khasaaraha ka dhashay qarax lala eegtay gaari ay la socdeen dad rayid ah, kaasoo ka dhacay inta u dhaxeysa magaalooyinka Mahadaay iyo Jowhar ee gobolka Shabeellaha Dhexe, gaar ahaan halka loo yaqaano Doonka Buur fuule.
Ilaa laba ruux ayaa la xaqiijiyay iney ku dhinteen qaraxa oo la sheegay inuu ahaa noociisa miino nooca dhulka lagu aaso, waxaana ku dhaawacmay tiro intaas ka badan.
Dadka ku dhaawacmay qaraxa miino ee gaariga haleelay oo aan tiradooda rasmiga ah la xaqiijin ayaa la gaarsiiyay Isbitaalo ku yaala magaalada Jowhar si ay u helaan daryeel Caafimaad.
Wararka ayaa intaasi ku daraya in gaariga uu guud ahaantiisa burburay, lamana oga in qaraxaan uu ahaa mid lala rabay gaarigaan lala eegtay oo ay la socdeen dad u badnaa dhalinyaro oo kusii jeeday Jowhar.
Deegaankaan uu maanta qaraxa miino ku qabsaday gaariga dadka rayidka ah saarnayeen ayaa waxaa horay sidaan oo kale uga dhacay qaraxyo miino oo waxyeelo dhimasho iyo dhaawacba leh u geystay dad shacab ah oo ku safraayay wadadaas.
Ugu dambeyntii ma jiro wax war ah oo kasoo baxay dhanka laamaha amaanka maamulada Jowhar iyo Mahadaay oo ku aadan qaraxaan waxyeelada kala duwan geystay ee maanta ka dhacay deegaanka Doonka Buur fuule.