Talaado, January 28, 2025 (HOL) - Ugu yaraan 4 qof oo shacab ah ayaa ku geeriyooday duqayn diyaarado aan la aqoon ay ka geysteen deegaanka Sixna oo Koonfur kaga beegan degmada Qandala ee gobolka Bari.
Goobta lagu beegsaday qoysaskan waxaa ku dhow togga Jaceel oo kamid ah farriisimaha ugu waawayn oo ay kooxda Daacish ku leeyihiin buuraha Calmiskaad.
Guddoomiyaha degmada Qandala Axmed Khuurshe ayaa xaqiijiyay geerida afarta qof iyo dhaawaca tiro intaas ka badan, wuxuuna sheegay in ay ka xun yihiin falkaan, isagoo sheegay in bartilmaameedku ahaa kooxda Daacish.
Guddoomiyaha degmada Qandala ayaa dadka shacabka ah ku wargaliyay inay ka fogaadaan goobaha ay ka dhow yihiin Daacish, isagoo sheegay in duqeymaha lagu taageerayo howlgalka ciribtirka Daacish ay sii socon doonaan.
Si kastaba ha ahaatee, lama oga diyaaradaha duqeymaha geystay, hase ahaatee, dowladda Imaaraatka ayaa wararku sheegayaan inay Puntland ka caawinayso duqeymaha ka dhanka ah kooxda Daacish, waana markii 3aad oo buuraha Calmiskaad duqeymo laga fuliyo tan iyo December.