Hiiraan Online

 

Arbaco, January 29, 2025 (HOL) - Wararka ka imaanaya degnada Deyniile ee magaalada Muqdisho ayaa sheegaya in iska hor imaad sababay dhimasho iyo dhaawac uu goordhaw ka dhacay degmada Deyniile ee magaalada Muqdisho.

Iska hor imaadka oo si gaar ah uga dhacay Xaafada Gubta ayaa ahaa mid dhexmaray askar ka tirsan ciidanka dowladda iyo rag hubeysan oo la sheegay iney ku howlanayeen dhac dadweyne, halka warar hoose ay sheegayaan iney ka tirsan yihiin Al-shabaab.

Ilo ku sugan degmada Deyniile ee magaalada Muqdisho ayaa warbaahinta u xaqiijiyay in iska hor imaadka lagu dilay laba nin ee hubeysana.

Iska hor imaadkaan khasaaraha dhaliyay ayaa sababay in mudo kooban uu hakad ku yimaaday dhaq dhaqaaqa iyo isku socda xaafada Gubta ee degmada Dayniile, halkaas oo ay gaareen ciidamo isugu jira Nabad sugid iyo Booliisa Militaare.

Ugu dambeyntii ma jiro wax war ah oo kasoo baxay dhanka saraakiisha laamaha amaanka dowladda oo ku aadan weerarka khasaaraha geystay ee dhexmaray ciidamada dowladda iyo ragga hubeysan ee la dilay, waxaana weerarkaan uu kusoo aadaya, iyadoo maalmihii lasoo dhaafay xaaladda amaan ee Muqdisho ay ahayd mid wanaagsan.