Jimco, Maarso 21, 2025 (HOL) - War saxaafadeed ka soo baxay Wasaaradda arrimaha dibadda Soomaaliya ayaa soo dhoweeysay qabsashada Ciidamada Militariga Sudan ee guud ahaan magaalada Khartoum ee dalkaasi Sudan kadib markii laga ceyriyay Maleeshiyaadka RSF.
"Jamhuuriyadda Federaalka Soomaaliya waxa ay si weyn ugu qanacday warka sheegaya in ciidammada Qalabka Sida ee Suudaan ay dib ula wareegeen gacan ku haynta Aqalka Jamhuuriyadda ee ku taalla bartamaha caasimadda dalkaas ee Khartoum, ka dib laba sano oo halgan hubeysan ay ku jireen" ayaa lagu yiri War saxaafadeedka Wasaaradda arrimaha dibadda Soomaaliya.
Wasaaradda waxa ay tilmaamtay inay markale ku celinayso mowqifkeeda adag ee ay ku taageereyso madaxbannaanida iyo wadajirka dhuleed ee Suudaan.
War saxaafadeedka wasaaradda arrimaha dibadda Soomaaliya ayaa shaaca looga qaaday in ay mar waliba Dowladda Soomaaliya garab taagan tahay hay'adaha sharciga dadaallada ay ugu jiraan adkeynta amniga iyo xasilloonida iyo sidii loo gaari lahaa midnimo qaran.
"Habeennadan barakeysan ee tobanka dambe ee bisha Ramadaan waxaan Allaha awoodda leh uga baryeynaa in uu ku gaarsiiyo amni iyo nabad gelyo guud ahaan dalka Suudaan, isla markaana uu u caleema saaro dadaalka shacabka walaalaha ah horumar iyo barwaaqo dheeraad ah" ayaa lagu yiri war saxaafadeedka.