Jimco, Maarso 28, 2025 (HOL) - Danjire J. Peter Pham, oo hore Maraykanka ugu qaabilsanaa gobolo ka tirsan Afrika, ayaa wax lala yaabo ku tilmaamay in dowladda Soomaaliya ay dekedo u soo bandhigto Maraykanka.
Pham, oo ka mid ah siyaasiyiinta aadka ugu dhow Madaxweyne Trump, ayaa qoraal uu ku baahiyay barta X wax lala yaabo ku tilmaamay dekedaha la sheegay in Soomaaliya ay u soo bandhigtay Washington si ay uga hortagto aqoonsiga Somaliland.
Waxa uu sheegay in arrintani ay cay ku tahay Madaxweyne Trump, isagoo xusay in sannad kasta hal bilyan oo dollar uu Maraykanku siiyo Soomaaliya, taasoo uu sheegay inay khasaare ku tahay cashuur bixiyayaasha Maraykanka.
"Imika Xasan Sheekh Maxamuud waxa uu u maleynayaa in dadka Maraykanku ay doqmo yihiin, oo uu siin karo dekedo aanu maamulin, kuwaasoo ku yaalla Somaliland iyo Puntland," ayuu yidhi Pham.
Pham, ayaa ka mid ah siyaasiyiinta ugu firfircoon ee ka hadla siyaasadda Madaxweyne Trump, sidoo kale wuxuu si xooggan ugu ololeeyaa aqoonsiga Somaliland.
Jariirada Semafor, oo fadhigeedu yahay New York, ayaa sheegtay in ay heshay waraaq uu Madaxweyne Xasan Sheekh u diray Trump, isaga oo usoo bandhigay in uu siin doono maamulka dekedaha Berbera iyo Boosaaso, taa badalkeedana Washington ay ka baaqsato aqoonsiga Somaliland.
Olole ay siyaasiyiin ka tirsan Jamhuuriga Maraykanku ku doonayaan in Somaliland lagu aqoonsado ayaa ka bilowday Maraykanka labadii sanno ee ugu dambeeyay, iyadoo dowladda Soomaaliya ay dadaal ku bixinayso inay joojiso.