Isniin, Maarso 3, 2025 (HOL) - Maamul-gobolleedka Puntland ayaa sheegay inay heleen xog
muujinaysa in xubno ka tirsan kooxda Daacish lagu daweyn jiray isbitaallo ku
yaalla magaalada Hargeysa ee Somaliland, sida uu sheegay mid kamid ah
wariyayaasha la socda ciidamada Puntland ee la-dagaallamaya kooxda Daacish.
Wariyaha ayaa tebiyay in ciidamada Puntland ay heleen
warqado ay ku qoran yihiin macluumaad sir ah oo laga helay deegaannadii ugu
dambeeyay ee laga qabsaday Daacish. Sida lagu sheegay warbixinta, warqadahan
ayaa tilmaamaya in shirkado ganacsi loo malaynayo inay fududeeyeen qaadista
dhaawacyada ama ay dhaqaale siiyeen kooxda.
Laamaha ammaanka Puntland ayaa sheegay inay bilaabeen
baaritaanno ku aaddan eedeymahan, iyagoo si ku-meel-gaar ah u mamnuucay in la
shaaciyo magacyada isbitaallada iyo xarumaha ganacsiga ee lala xiriirinayo
arrintan.
Puntland ayaa horey ugu eedeysay Somaliland inay taageerto
kooxaha Daacish iyo Al-Shabaab ee ka dagaallama deegaannadeeda, hase yeeshee
Somaliland waxay horey u beenisay eedeymahan.
Hiiraan Online si madaxbannaan uma xaqiijin karto saxnimada
warqadaha la helay.
Todobaadkii hore, Puntland ayaa sheegtay in ciidamadeedu ay
deegaannadii laga xoreeyay kooxda Daacish ka heleen lacagta shilinka
Somaliland.
Madaxweynaha Puntland, Saciid Cabdullaahi Deni, ayaa hoosta ka xariiqay y
in wejiga saddexaad ee howlgalka Hillaac lagu beegsan doono shakhsiyaadka iyo
shirkadaha lagu tuhunsan yahay inay xiriir la leeyihiin Daacish.
"Cid kasta oo ka faa’iidaysa ama maalgelinaysa
argagixisada waan bartilmaameedsan doonaa," ayuu yiri Deni.
Saraakiisha ammaanka Puntland ayaa xoojiyay dadaallada la
dagaalanka argagixisada, iyagoo sheegay inay diiradda saarayaan burburinta
shabakadaha dhaqaale iyo saadka ee taageera kooxaha hubeysan ee Soomaaliya.
Oggeysiiska sixida warbixintan iyo farriinta tifaftiraha
Hiiraan Online waxay wax-ka-beddel ku sameysay warbixintan
si loo waafajiyo heerarka saxafadeed ee saxda ah. Dib-u-habeynta aan ku
sameynay warbixintan waxaa kamid ah, inaan ku darnay halka aan ka soo xiganay
warka oo ah wariyaha xogtan ka soo tebiyay ciidamada Puntland, si loo caddeeyo
isha warbixinta. Waxaan isticmaalnay ereyo taxaddar leh sida "loo
malaynayo" iyo "lagu tuhunsan yahay", iyo in Hiiraan Online
aysan si madaxbannaan u xaqiijin karin dukumintiyada la helay.
Talaabooyinkan ayaa qayb ka ah dadaallada Hiiraan Online ee
lagu xaqiijinayo hufnaanta, saxnaanta, iyo waafajinta heerarka saxafadeed ee
sugan.