4/6/2025
Today from Hiiraan Online: President Mohamud condemns assassination of senior army offi...
Wararka Maanta- Isniin, Mar 3 , 2025
Yuusuf Dabageed "Dagaal kasta waxuu ku dhamaadaa wadahadal, balse kan Al-shabaab waxuu ku dhamaanaya xabbad"
 

Isniin, Maarso 3, 2025 (HOL) - Madaxweyne ku xigeenka maamulka Hirshabeelle Yuusuf Axmed Hagar Dabageed ayaa ciidanka Macawiisleyda beesha Xawaadle ugu baaqay iney labada jibaaraan dagaalka ka dhanka ah kooxda Al-shabaab ee looga xureynaayo deegaanada ay kaga sugan yihiin maamulkaas.

Yuusuf Dabageed ayaa sheegay in dagaalka haatan lagula jiro Al-shabaab inuusan laheyn wax wadahadal, halka marka ay dagaalamaan dalalka deriska ah ama Beelaha Walaalaha la raadiyo wadahadal lagu dhameeyo dagaalka.

“Dagaalka Kasta oo dhaca waxa uu ku dhamaadaa wadahadal balse kan Shabaab waxa uu ku dhamaanaa xabbad, Nimankii bac guduudan oo biyo ku jiraan idiin diiday ma idiin ogolaanayaa ceelashaas idiin qodan, labo qof oo dambe iskuma dili karto waxa aad isku heysaan, walax dambe oo aan ‘AS’ in aan xabbad ku ridno ma rabno” ayuu yjri Yuusuf ku xigeenka Hirshabeelle Axmed Hagar Dabageed

Wuxuu sheegay in loo baahan yahay in ciidamada Federaalka iyo kuwa deegaanka ee iskaashanaya iney u hoggaansamaan madaxda hogaanka u ah howlgalada, isagoo xusay haddii la is khilaafo in laga dhaxlayo kala qaybsanaan iyo guuldaro dagaal.

"Cadowgaan wuxuu walaaleeyey dadkeenii deriska ahaa ee difaaca isugu jiray. Waxaan hubaa in laga adkaan doono haddii dadkeenu is-kaashadaan. Walaalayaal, maanta kadib dhiig aan ahayn kan Shabaab idiin ma banaana, ciidanka dowladda ayaa kow ah, idinkana ayaa laba ah, weerara cadowga, iska ilaaliya khilaafka, iskana amar qaata walaalayaal, waad liibaanaysaan,” ayuu yiri madaxweyne ku xigeenka Hirshabeelle Yuusuf Axmed Hagar.

Hadalkaan kasoo yeeray Yuusuf Dabageed ayaa kusoo aadaya, iyadoo gobolada Hiiraan iyo Shabeelaha Dhexe ay ka socdaan howlgalo xooggan oo ka dhan ah Al-shabaab oo u muuqata in markale awoodeeda dib u soo laba kacleeysay.