By Adam Abdulle
Tuesday June 28, 2022
Qaybta Koowaad:
Maareynta Qashinka (Waste Management)
Qashinka lagu shubo agagaarka xeebta Jazeera (Xuquuqda sawirka Hiiraan Online April 2016)
"Waxaan ugu noolnahay meerahan sidii
inaan haysanno mid kale oo aan aadno".
–Terry Swearingen
Maareynta qashinka (ama qashin-qubka) waa
hababka loo maareeyo qashinka. Qashinku, waxa uu noqon karaa adke, dareere, gaas
iwm. Nooc kasta oo qashin ah waxa uu leeyahay qaab loo asturo ama loo maareeyo.
Ujeedada ugu weyn ee loo maareynayo qashinka waa in la yareeyo saameynta,
waxyeelada iyo khataraha caafimaad, dhaqaale, deegaan iyo bulsho ee ka dhalan
kara qashinka.
Qashinku waxa uu bulshada u keenaa caafimaad-darro,
waxa uu magaalooyinka ka dhigaa meel wasaq ah oo aan udgooneyn oo ay adag tahay
in lagu noolaado, waxaa kale uu deegaanka ku yahay khatar weyn oo ay tahay in
laga hortego ama la maareeyo.
Bilowgii ilbaxnimada aadanaha, dadka ku nool
magaalooyinka waxay qashinka ku soo tuuri jireen waddooyinka iyo jidadka. Hase
ahaatee, markii la ogaaday khatarta faraha badan ee uu leeyahay qashinku waxaa
dhacday in sharciyo ama xeerar laga soo saaray asturaadda qashinka. Waxaana ka
mid ahaa in qof walba mas’uul ka yahay in gurigiisa ama goobtiisa ganacsi
nadiif ahaato. Si arrinkaasi u fududaadana waxa ay boqortooyinkii ama
dowlidihii jiray dadka ka caawin jireen uruurinta, asturidda iyo baabi’inta
qashinka.
Islaamku aad ayuu u booriyay nadaafadda.
Waayo Diinta Islaamka waa diinta nadaafadda. Iimaanku waa dhowr iyo todobaatan
ama dhowr iyo lixdan qaybood, midka ugu hooseeyana waa dhibta (qashinka iwm) oo
laga leexiyo waddada. Sidoo kale, diinteenna suubban waxa ay
tilmaameysaa in nadaafaddu tahay iimaanka barki.
Kama mideysna dunidu hannaanka loo maareeyo
qashinka. Waxaa laga yaabaa in waddamada horumaray ay isticmaalaan hannaanka
casriga ah ee maareynta qashinka, halka waddamada soo koraya ay adeegsadaan
qaabab duug ah ama aan casri aheyn.
Qashinka waxaa loo maareeyaa qaabab kala gedisan,
waxaana ka mid ah:
·
In la uruuriyo
qashinka, la raro, lana asturo ama dib looga faa’ideysto.
·
In la sameeyo
bullaacado ama biyo-mareenno ay maraan biyaha wasaqda ah.
·
In la
sameeyo wacyi-gelin ku aaddan qashinka iyo khataraha caafimaad, bulsho,
xayawaan, deegaan iyo dhaqaale ee ka dhalan karta haddii aan si fiican loo
maareyn.
·
In lala
yimaado hannaan lagu yareynayo (reduce), dib loogu isticmaalayo (re-use), ama
dib loogu warshadeynayo (recycle) qashinka.
·
In la
sameeyo sharciyo la xiriira maareynta qashinka.
·
In
bulshada lagu dhiirriggeliyo in ay isticmaalaan qashinka (bacaha) ay fududdahay
in ay baaba’aan ama in ay isticmaalaan agabyada kale ee aan deegaan dhibta u
keeneyn (dambiil, sallad, qariirad iwm).
·
In la
sameeyo godad qashin qub ah oo waaweyn (landfill).
·
In la
gubo qashinka (incineration).
·
In laga
caawiyo bulshada in ay helaan meelo ay qashinka ku sii uruuriyaan inta laga
daabulayo (residential, business waste pickups, and roll-off dumpsters).
In si fiican loo maareeyo qashinka waxa ay dowr
muhiim ah ka qaadataa in la helo magaalooyin waqti dheer jiri kara, laguna
noolaan karo. Balse, maadaama lacago faro badan ay ku baxaan maareynta qashinka
waxa uu arrinkaani caqabad weyn ku tahay waddamo badan oo soo koraya. Tusaale,
waxaa la qiyaasaa in miisaaniyadda ku baxda maareynta qashinka ee dowladaha
hoose gaareyso 20% - 50%. Si caqabadan
loola tacaalo waddamada qaar ayaaba qashinka ka sii macaasha oo waxaa jira
waddamo qashinka u yaqaana ama u arka dahab (garbage is a gold) maadaama ay dib
uga faa’ideystaan lacagna ka sameeyaan maareynta qashinka.
Si loo helo caasimad nadiif ah, bilicsan,
lagu noolaan karo, soona jiidata dalxiisayaal calami ah, jecleystaan dadkeedu, siina
jirta waqti dheer waa in dowladda hoose ee Xamar ku dadaashaa sidii loo heli lahaa
habab iyo hannaanno mideysan oo loo maareeyo qashinka guryaha, waddooyinka, goobaha
ganacsiga, warshadaha yar yar, ama kuwa ka dhasha roobabka iyo daadadka
(maadaama meel walba sar laga taagay/o waxaa la arkaa in biyaha roobku
sameeyaan daadad waxyeeleyn karan nafta iyo hantida bulshada, marka waa in
arrintaas laga sii digtoonaado oo loo diyaariyo meelihii ay mari la haayeen iyo
togaggii ay ku shubmi lahaayeen).
Ugu dambeyn, waxa aan halkan ku soo
gudbinayaa talooyin ku saabsan sida ugu sahlan ee loo wax looga qaban karo
qashinka Caasimadda:
§ In la tayeeyo/sameeyo adeega maareynta
qashinka ee Caasimadda.
§ In bulshada aad looga wacyi-geliyo
dhibaatooyinka qashinku leeyahay.
§ In qashinka aan loo arkin qashin uun e, lala
yimaado hannaan looga faa’ideysan karo.
§ In la sameeyo xeerar la xiriira maareynta
qashinka ama la xoojiyo kuwa jira (waaba haddii ay jiraan e).
§ In miisaaniyad loo qoondeeyo maareynta
qashinka.
§ In la sameeyo toddobaad loo asteeyay qashin uruurinta,
si bulshada loogu wacyi-geliyo muhiimadda nadaafadda u leedahay caasimadda iyo
khataraha ka dhalan kara qashinka.
§ In degmooyinka lagu tartansiiyo nadaafadda
iyo bilicda caasimadda, degmadii guuleysatana la abaalmariyo.
§ Maadaama ay Xamar tahay muraayaddii dalka,
waa in lagu dadaalo in nadaafaddeedu ka marag kacdo arrinkaas si magaalooyinka
kale ay wax uga bartaan uguna daysadaan (benchmarking).
§ In dowladda hoose kala shaqeyso wasaaradaha
uu quseyo arrinkaan (maareynta qashinka).
§ In la hirgeliyo hababka loo maareeyo qashinka
ee aan kor ku soo xusay -ugu yaraan intii laga
awoodo.
W/Q: Adam Abdulle