By Dirir Cabdi Ibrahim (Goodax)
Thursday March 21, 2024
Jeneraal Odowaa Yuusuf Raaghe
waxaa xilkii Taliyaha Xoogga Dalka laga qaaday 19/06/2023, asagoo xilkaas hayay
muddo ku siman: “3 sano, 9 bilood iyo 27 cisho”. Isla markaana, la iskuma diidana
doodina kama taagna in xilku yahay meerto qofba muddadeeda qabanayso, ayadoo
marka kasta isbedelku ku salaysan yahay hagaajinta iyo horumarinta arrimaha la
xiriira waajib-gudashada Xilka la iska bedelayo.
Su’aasha ka guuxeysa maanka iyo
maskaxda qof kasta leh dareen fayoow iyo damiir dalkiisa wanaag iyo guul la
jecel waxay tahay:
“Jeneraal Odowaa ma loo darsaday?
Doorkiisi Hoggaaminta Ciidanka ma la tabay?”
Aniga xaggeyga jawaabtu ayadoo togan
(toos ah) oo arar iyo afgobaadsi ka maran waxay tahay: HAA, waa loo darsaday
Jeneraal Odowaa!!!!!.
Ciddii taladaas bixisay iyo wixii ay
markaas ayadu tabaysay, anigu ma fahmi karo, balse waxaan hubaa inaan taladeedi
la mahadin.
Waana jawaab aan hubo in ay ila
qaadanayso qof kasta oo qiimayn dhaba ku samaysa xaaladda Ciidanka “Shalay iyo
manta”:
1- Dayacaad, kala daadsanaan ayaa muuqata,
saamayn weyn ku yeelatay niyaddii, hammigii iyo moraalka Ciidanka.
2- Qasaaraha naf iyo saanad, guud
ahaan, gaaray Ciidanka xagga goobaha
dagaalka, sababtuna u muuqato inay tahay dhaliilo hareeyay qaabka iyo
go’aanada hawgalada, kuwaasoo guux iyo tabasho ka dhex abuuray
bulshoweynta dhexdeeda.
3- Ciidamadii Danab iyo Gorgor ahaa
bilicda iyo awoodda Xooga Dalka maxaa ka haray?
4- Ciidankii tirada iyo tayada lahaa
ka soo noqday Eritrea ma muuqdaane meel ha lagu sheego.
5- Dagaalkii lala galay Al-Shabaab waxaa
laga dhaxlay:
“Dad iyo duunyo beel iyo degaanadii oo laga soo baxay”.
Taliyaha Xoogga Dalka waa xil Ciidan
go’aandiisu saamayn ku yeelanayo nafta, saanadda iyo agabka taakulaynta
Ciidanka, waana taas midda faraysa in magacaabidda xilkaas loo talo badsato,
ayadoo dhinacyo badan laga eegayo, sida in mudnaan gaara la siiyo iswaafajinta Xilka,
Darajada, Aqoonta iyo kartida qofka la magacaabayo, si loo helo waajib-gudasho
hufan oo mirodhal ah, taasoo ayaduna, markeeda, saamayn muuqata ku yelanaysa
moraalka iyo kalsoonida Ciidanka.
Ciddii siyaasadeysa Xilka iyo Hawgalka
Ciidanka ha ogaato inay ku qamaarayso nolosha dhallinyaro lagu soo tabar iyo
tacab belay oo dalka iyo dadka qiimo weyn ugu fadhiya.
Jeneraal Odowaa waa 37 jir ku tilmaaman inuu
leeyahay:
- Karti qofeed u dhalasho (Rabbaani
ah)
- Dareen wadanimo kaamil ah.
- Aqoon iyo waaya-aragnimo dagaal.
- Geesinimo iyo daacadnimo uu ku kasbaday
kalsoonida iyo ruuxda Ciidanka.
Intasoo dhami waxay tusaale u yihiin
in Jeneraal
Odowaa u muuqdo in, mar kale, aan looga maarmin Hoggaaminta Ciidanka
Xoogga Dalka Soomaaliyeed.
Sida ku cad maqaal aan cinwaan uga
dhigay: “Jeneraal Odowaa Dhiirigalin
Mooyee Dhaliil Nagama Mudna” kaasoo Hiiraan Online ku soo baxay 24kii
Seteembar 2019, waa labo cisho kadib markii loo magacaabay Taliyaha Xoogga
Dalka.
Maqaalkaas hore waxaan ugu jawaabayay
dad ku doodayay inuu Odowaa yahay Sarkaal da’ yar oo aan mudnayn inuu qabto Xil
heerkaas ah.
Waxaa ila qumanaatay inaan, mar kale,
halkaan idinkula wadaago qayb ka mid ah Taariikh-nololeedka Jeneraal
Odowaa heerka Sarkaal Ciidan, aan kasoo goostay (riftay) maqaalkeygi
hore:
-2008: Leyli Sarkaalnimo ayuu u galay Dugsiga Tababarka Ciidanka Bihanga
ee dalka Uganda, asagoo soo bartay tabta dagaal ilaa heer Urur.
-26/12/2009: Waxa uu qaatay darajada
“Xiddigle “, isla sanadkaas ayuu dalka Ugaanda ku qaatay tababar kale Abbaanduulka
Hoose.
-2010: Ayuu dalka dib ugu soo
laabtay asagoo tababar 45 cisho ah ku qaatay Dugsiga Jeneraal Kaahiye ee Xamar.
- Sanadihii 2010-2011-2012: Wuxuu door firfircoon ka qaatay dagaaladii
lagu xoreynayay Gobolka Banaadir,
Shabeelada Dhexe iyo Shabeelada Hoose, kadibna u dalacay darajada “Laba
Xiddigle”.
-2013: Wuxuu qaab abaalmarin ugu dalacay darajada “Dhamme”, isla
sanadkaas ayuu galay Jaamacadda Difaaca Qaranka Istanbul, asagoo qaatay tababar
Ciidanka Lugta ah iyo luqadaha.
-2014: Ayuu dalka ku soo noqday,
isla sanadkaas ayuu ku laabtay, mar kale, dalka Turkiga asagoo galay Kulliyadda
Dagaalka Turkiga.
Wuxuu soo bartay Istratejiyada
Dagaalka heer Guuto “War strategy at Brigade Commander Level”.
-Luuliyo 2016: Ayuu dalka ku soo laabtay, asagoo noqday mid ka mid ah
Saraakiisha ugu firfircoon XDS, waxaana loo dalacsiiyay darajada “Gaashaanle”. Isla
markaana loo magacaabay Abbaanduulaha Ururka
60-aad Ciidanka ilaalada
Madaxtooyada.
-Maarso 2018: Wuxuu noqday Taliyaha Ururka 60-aad Ciidanka ilaalada
Madaxtooyada, asagoo loo dalacsiiyay darajada “Gaashaanle Dhexe”.
-Agoosto 2018: Asagoo ah Taliye Guuto ayaa loogu daray xilka Abbaanduulaha XDS,
loona dalacsiiyay darajada “Sareeye Guuto”.
-Maarso 2019: Waxaa loo magacaabay
Taliyaha Ciidanka Dhulka (Ground Force Commander).
-22/08/2019: Waxaa loo magacaabay Taliyaha Xoogga Dalka.
Waxaa xusid mudan in, Madaxweyne
Cabdullahi Yusuf oo lahaa
waaya-aragnimo iyo Aqoon Sare Ciidan, muddo
xileedkiisi Madaxweyne (2005-2008) ku qancay kartida iyo firfircoonida Odowaa oo
markaas ka tirsanaa Guutada 54-aad ilaalada Madaxtooyada, waxay ahayd
xilli xaaladda nadadgalyo aad u liidatay
Madaxtooyaduna hadba meel u guureeysay Baydhabo, Jowhar iyo Xamar.
Waana halka ay Odowaas Yusuf Raaghe uga
bidhaantay fursadda ah inuu helo Tababar Leyli Sarkaalnimo iyo daahfurka noloshiisa
Sarkaalnimo, kadib Tababaro iyo Dallacaado is dabajoog ahaa ilaa uu ka gaaray
darajada Sareeye Gaas iyo Xilka Taliyaha Xoogga Dalka Soomaaliyeed.
“Caamahaan dadkeeniyo
inta calanka jecel iyo
ciidda iyo difaaceed
cidkastaa ogaatoo
Ciidankaa u baahane
Odowaa u soo celi.
Cabsi midaan aqoon iyo
geesi caana inuu yahay
cadawguba dareenyoo
waa lagu cabsiiyaa,
Ciidankaa u baahane
Odowaa u soo celi”.
Guul iyo Gobannimo
Dirir Cabdi Ibrahim (Goodax)
[email protected]
Teleefoon: 00447960956384
London